कतेक बदलि गेल संसार
कतेक बदलि गेल संसार *************** चाउरक बदलेन माछ भेटैत छल, आमक बदलेन खरबूजा, झिल्ली कचरी कतय बिलाओल, सांझ पङैत कंसारक भूजा। कतेक बदलि---------। कतय बिलाओल बखारी मुनहर, कतय बिलाओल संदूक आ कोठी, कतय बिलाओल उखैर समाठ मेह, कतय बिलाओल जांत ओ ढेकी। कतेक बदलि---------। भोर-सांझ दुपहर छल लोकक हलचल, भूत-प्रेत चूरीणक डरे तैयो सहमल, तांत्रिक-वैद ओझा सबहक भरमार, जङी-बूटी, बुढ-पुरानक नुस्खा उपचार। कतेक बदलि---------। कतय गेलैय सांचीक धोती कुर्ता, मिरजई-पाग,टीक ठोप आ दुपट्टा, पायर मे खङाम, माथ पर मुरेठा, नै मौगी के घोघ,नै पुरूषक खखसबाक वेवहार। कतेक बदलि---------। आमक गाछी मे नव बांसक झूला, सिंगी-पताली,चोरानुकी आ रासलीला, जुङि-शीतल मे बांसक फुचकारी, करीन पटबय लेल खेती के औजार। कतेक बदलि---------। कतय बिलाओल हुक्का लोली, फगुआ गीत, रंग- अबीर संग माटिक होली, सामा-चकेबा,झिलहोरि आ पराती, नव कुट्टी चूङा संग गुङक वेवहार। कतेक बदलि---------। डमरू बाजय , सबमीलि कय दौङी, के आंगा, के पांछा, सब छौङा छौङी, वाइसकोप सँ सिनेमा देखी बारम्बार, भाट-पमरिया,गुदरिया बाबा के भरमार...